NOVI TESTI CANTA U POPULU CORSU !!!!!

eccu qualchi novi testi di CANTA U POPULU CORSU
pa cumpleta quissu beddu situ !!!:D
À PASQUALE PAOLI
O Bà, quale sò ste voce chì ci porta a Tramuntana
U sentu marchjà vicinu, cù la so presenza umana
Cantanu lu versu anticu è lu ricordu luntanu.
Vegu lucicà la stella d'un celu meravigliosu
Chì ci manda versu à piana quandu Golu si riposa
Oghje simu in Ponte Novu incù l'eroi gluriosi.
Lottanu cù farru è focu daret'à lu Generale
Incù la Testa di Moru sott'à l'ochju universale
U ventu porta la storia di corsi di u Gran'Pasquale.
Cumbattenu incù baldenza, cù la so bandera in manu
Chì s'innalza com'è un fiore n'a sperenza di u veranu
È lu versu piglia forza, canta la Nazione Corsa.
L'hà purtata'n'u so senu, st'amore di a fedeltà
Oghje sempre più presente dumanda la verità
À lu pede di lu Ponte, a croce per sempre stà.
Da la voce di culombu, noi ci sentimu purtà
L'anu scritta incù u so sangue, stu nome di libertà
Nant'à terra, nant'à l'onda, davant'à l'umanità

VOCERU SOPR'À LI MORTI DI PONTE NOVU
Quandu ghjunse la nutizia
Di tamantu scumpimentu
Pertiamu à mezanotte
À pedi da lu cunventu
Centu fiaccule di dera
Di Vicu partianu à tempu.
Pò passamu la muntagna
In Corti ghjunsimu à ghjornu
Sunavanu le campane
Un dolu di l'altru mondu.
Guardate lu mio patrone
Cun trè ferite in lu spinu
Sottu li mio dui figlioli
Senza croce nè cuscinu
Pò fallava u fiume rossu
Di sangue cristianinu.
Avvedeci à l'altru mondu
Cusì brutta sta sintenza
Perdiamu li nostri cari
Cù la nostra indipendenza.
U VINU
Quellu ch'ùn beie vinu
Ùn po sapè o Ghuvan Pà
Quandu stu licore divinu
À noi ci face cantà
Quandu ci manghjemu un morsu
Pane prisuttu o bacalla
Un pezzu di furmagliu corsu
Lu vinu lu face fallà.
O Ghjuvan Pà, o Ghjuvan Pà
Senza vinu ùn ci po stà.
O chì piacè, ch'ellu ci face,
È per avè, salute è pace,
Ancu à i rè, ùn li dispiace,
L'amanu tantu, per Diu santu,
Ùn amà què, ùn c'hè nisunu,
Face piacè, anc'à ognunu,
Eccu perchè, canta ognunu,
O chì piacè, o chì piacè...
A figliola di Zia Fiora
Ùn si vulia fà tuccà,
Ella dicia chì l'amore,
Era una calamità,
Fattu l'affare à a so cummare,
Maliziosa li dumandò,
A zitella cusì cantò,
Cara cummà, cara cummà,
Senza amore ùn si po stà.
O chì piacè, ch'ellu ci face,
È per avè, salute è pace,
Ancu à i rè, ùn li dispiace,
L'amanu tantu, per Diu santu,
Ùn amà què, ùn c'hè nisunu,
Face piacè, anc'à ognunu,
Eccu perchè, canta ognunu,
O chì piacè, o chì piacè...
Fine tantu chì sopr'à sta terra
Amore è vinu ci sarà,
Perchè face sempre la guerra,
Perchè stirpà l'umanità,
Beiemu vinu à tutte l'ore,
Forza è curagiu ci darà,
È po pensemu à fà l'amore,
Invecce d'andà à tumbà,
O Ghjuvan Pà, o Ghjuvan Pà,
Amore è vinu è libertà,
O Ghjuvan Pà, o Ghjuvan Pà,
Amore è vinu è libertà...
U VERSU NOVU

Nò chì stu locu ùn'hè chjucu
Chì ghjè quellu di u core
U locu di l'amore tenutu.
Nò chì sta vita ùn hè stretta
S'ella hè quella pelegrina
A strada di a matina diletta.
Nò chì stu tempu ùn hè scarsu
S'ellu hè quellu di l'accordu
Cù lu vechju ricordu spapersu.
Cantemu un verdu veranu
Un avvene à suminà
Chì dumane leverà u granu
Cantemu lu versu novu
Cantemu lu benestà
L'amore di travaglià ritrovu.
Nò chì l'avvene ùn hè cottu
Un alba nova leverà
È a rottu surterà da u ciottu.
Nò chì sta lingua ùn hè persa
Chì s'ella ne fù sbandita
Avà dicerà la diversa.
Cantemu un verdu veranu
Un avvene à suminà
Chì dumane leverà u granu
Cantemu lu versu novu
Cantemu lu benestà
L'amore di travaglià ritrovu.

TRÀ SOLE È MORTE
A tomba hè scialbata di sole
L'anime sò strutte di rena
U cantu s'avvinghje di ventu
U lamentu ci s'asserena.
È simu tutti in la to voce
Da celuvolta à ochji pena
U cantu s'accinghje d'eternu
È l'ore ci s'asserenanu.
È sò parolle senza sensu
Nodu vivu di l'incantesimi
Ritu à barbari battesimi
È l'ore ci s'asserenanu.
È simu unu in quellu veranu
Dolce cum'è rosa la mente
Spugliatu tutti l'Occidenti
È l'ore ci s'asserenanu.
A pace a verità di sempre
Sò in a voce munimenti
Sfida à l'eterni silenzii
Carchi à orridi cuntenti.

SCRIVETI DA LUNTANU
È parlati di sti fiumi sott'à le stelle spapersi
À bramà li quattru venti ch'incantanu li mio versi
È li to ritimi suttili chì movenu l'universi.
Scriveti da luntanu.
È dorme in li to grembi cum'è'ss'antiche sunate
À fà nasce mille musiche da rompe le to imbuscate
È fiurisce le deserti ballendu sott'à e fruppate.
Sciveti da luntanu.
Nant'à e piaghje d'auturnu chì dormenu silenziose
Quandi a notte sunnieghja di stagione maliziose
È chì i tamburi di u mondu sposanu l'onde furiose.
Scriveti da luntanu,
Scriveti da luntanu.
PER CREDE IN TÈ
Per u pane d'ogni ghjornu
Cunsacratu in le to mani
Eiu credu,
Per u vinu d'ogni ghjornu
Benedettu in le to mani
Eiu credu.
Per quellu chì ghjè luntanu
È chì s'avvicina à tè
Eiu credu,
Per quellu chì chjama in vanu
È si ricunnosce in tè
Eiu credu.
Per a terra addisperata
Chì cerca a to lumera
Eiu credu,
Per a mamma addulurata
Chì canta la so preghera
Eiu credu.
Per u zitellu chì nasce
In l'erba di a fratellenza
Eiu credu,
Per l'agnellucciu chì pasce
In u pratu di a sperenza
Eiu credu.
Per i povari di u mondu
Chì a miseria addunisce
Eiu credu,
Per u dulore prufondu
Di a vita chì finisce
Eiu credu.
Per a fede patriotta
In cercà di libertà
Eiu credu,
Per u populu chì lotta
È chì ùn pò chè sperà
Eiu credu.
O SURELLA
È chì ne sera di dumane
Quandu e dite aradite
S'appiccanu à i muri
Di a notte straniera
In l'infame prigione.
È chì ne sera di dumane
Quandu l'anima stanca
Un altra forza di pienghje
Sott'u mantellu scemu
Di u tomba ragione.
È chì ne sera di dumane
Quandu si chjode l'ochju
Di l'umanu culpitu
Da u ferru di l'oddiu
Per fà lettu di sangue.
È chì ne sera di dumane
Quandu a mente burlata
Da l'infernu bugia
Si scioglie di u to essere
À l'ombra di e stanghe.
È chì ne sera di dumane
Quandu mughja rivolta
À u cantu di i ghjorni
Purtata da e surghjente
À l'esce d'ogni male.
È chì ne sera di dumane
Quandu l'alba di u nasce
Nant'a terra ferita
Ùn sera più miseria
In casa universale
Dumane...sera liberu !
O CORSICA DI E MUNTAGNE
Quandu la to voce prufonda ribomba per la muntagna.
Da li valli di Niolu fin'à li monti di Cagna.
Ci canta l'anima forte ch'in lu to sangue si bagna.
Quandu pienghjenu l'acelli aspittendu lu veranu.
È chì lu vechju si stracqua cù lu so fucile in manu.
Sentu strappà la catena chì ci affonda da luntanu.
Sentu risunà li canti da Sermanu à Scopamena.
Cum'è un mazzulu di fiori sbucciatu in le mio vene.
Pôrtanu forza luntanu cù la fede chì sustene.
O la mio Nazione viva inturniata d'ammarezza.
Rizzati oghje per sempre ch'hè ora di la to salvezza.
Cum'è li nostri antenati per strappà collu è cavezza.
Tù chì ai datu pane à l'anima furestera.
Mostraci la strada antica è da a più bella manera.
Cusì luntanu anderaghju, porteraghju a to bandera.

I SUMERI CASTRATI
Roncanu tutte l'estate
Per dui soldi in caffè
Sfranciseghjanu di core
Cantanu per fà piacè
Portanu camisgie à fiore
Li si pare di cantà bè.
"En même temps que tes jolis grands yeux"
I sumeri sò cappiati
Battenu per la marina
Facenu tamantu frombu
"Bruno" fasgianu è "Regina"
Scoppia incù li turisti
A canzona sumerina.
"Prendre le frais assise sur le gazon"
Di "tango" in "serenade"
Arpianu sempre in francese
Quandu scala a "pinzutia"
À si collanu in paese
À tasta lonzi è prisutti
Ùn c'hè bisogna à fà spese.
"Dis moi pourquoi rester à la maison"
U ritrattu di favore
Cù li parighjini à fiancu
O chì bellu sumerellu
Di cantà ùn'hè mai stancu
"Marinella la boudeuse"
Per buscassi qualchì franchi.
"Rappelle toi nos promesses et sermonts"
È finita la staghjone
Pertuti sò li battelli
Ùn c'hè più nulla à ruspali
Per li nostri sumeregli
Sì n'anderanu per Francia
À parlà di figatelli.
"Qui dèsuni les amants si souvent"
Si sente per li paese
Ch'elli sò tutti imbarcati
Ch'elli roncanu in Parighji
Cù l'amichi deputati
Quì finisce la canzona
Di li sumeri castrati.
ERIN
Oghje l'aghju ritrovu
Quellu sognu d'inguernu
D'un vechju quaternu
Datu à u cantu novu.
Quandu a biera si perde
In bicchjeri tamanti
S'accendenu li canti
Di terra è di verde,
Hè fora lu ventu
U ventu d'Irlanda.
Ùn sò mai luntanu
I to ritratti scemi
Sì di musica tremi
Canta u mondu sanu.
Lasciami maladì
Quelli senza passione
Schjavi di a ragione
È di poveri ardì,
Hè arrittu lu ventu
U ventu d'Irlanda.
Quandu rughjenu in mare
E timpeste d'esiliu
È chì l'onde in bisbigliu
Stridanu stonde amare.
C'hè sempre qualchì croce
Posta in sintinella
È d'armunia snella
Si veste la to voce
Hè preghera lu ventu
U ventu d'Irlanda.
EDMOND SIMEONI
Davant'à la terra intera
Per dà pettu à li scrucconi
Era un porta bandera
Di nome Edmond Simeoni.
È cun l'altri patriotti
Cumpagni d'insurrezione
Per delittu di ghjustizia
Fù turratu in prigione.
Si sente cantà Niolu
È ancu in ogni paese
A gloria di i patriotti
Man'à lu statu francese.
Noi dimu à stu guvernu
Ch'ellu fia attenzione
U corsu ùn teme nunda
Chì si batte cun ragione.
Simu un populu magiore
Micca una pupulazione
Ùn la credenu l'eletti
Sempre ladri à l'occasione.
Per tutti l'imprigiunati
Libertà sparghji to ale
Cunduci la testa mora
À la gloria universale.
Cù li populi fratelli
Scriveremu a nostra storia
È cusì senza timore
Canteremu la vittoria.
DI L'ESILIU
Beata quella terra
Beata quelli monti,
Nazione tant'amata
Chì campa in lu mio core
Sangue anticu di le mio vene
Intrecciate ind'è la storia
Oghje cercu a verità
Oghje cercu a libertà !
Beatu quellu vechju
Beata quella mamma
Di fede muta è santa
Stampata in u mio core
Puntelli di la mio casa
Cunforti di a mio vita.
Oghje cercu a verità
Oghje cercu a libertà !
Beatu quellu fornu
Beata quella fiara
Lume di a rivolta
Chì nasce in lu mio core
Pane biancu di sfurtuna
Levitu di tanta gloria.
Oghje cercu a verità
Oghje cercu a libertà !
CANTU

Per sti cimoni spartiventi
À u cantu eiu t'invitu
Da fà ribumba mare è monti
È l'orizonti à l'infinitu.
Quì sò canti di u cumunu
In l'aghja sola di u ritrovu
È canti vechji di rivolta
À u fà di u ghjornu novu.
À nome di e speranze nostre, cantu
U tempu vivu di e mosse, cantu.
Cantu per l'eterne ferite
Silenzii amari è mughji pienti
È per l'esilii è per battelli
È per sti mari cuntinenti.
Cantu si ! cantu in la to voce
L'idea ch'ùn si vole more
Quand'ella vena sveglia mondu
À u chjoccu di u mio core.
À nome di e speranze nostre, cantu
U tempu vivu di e mosse, cantu.
Cantu d'avvene incaminatu
È cantu scemu di l'amore
Fiorpuesia innamuratu
In bocca à l'eternu pastore.
Attu à fratellu luntanu
È cutate à l'inghjustizia
Parolle sfocu per viaghju
È versi fiumi d'amicizia.
À nome di e speranze nostre, cantu
U tempu vivu di e mosse, cantu.
ALERIA
Quel'venneri d'aostu
Si discità la storia,
La terra insanguinata
Apri la so memoria.
U dulore di l'omu
Si compra à prezzu vile
Quandu chjama a ghjustizia
Li mostranu u fucile.
Date la pace eterna
À l'omu marturiatu
È poi la libertà
À quellu ch'hè inghjuliatu.
Ùn hà primura di sangue
U statu tenebrosu
Fece morti è feriti
Cù un ministru scherzosu.
O Vergine Maria
O mamma tanta amata
Venite à lu rinforzu
La pace sutterrata
A TANAGLIA
Vedi ci sò li ghjorni
Scritti à u focu di a pena
Chì sumena in ogni locu, di vita
I so forni.
A fronda scema infredulita
In core di decembre hè cascata
Cum'è una lumera malata
Da la santa fiera tradita
À cunnosci tù a miseria ?
À crepa tempu à lu dulore
Cum'è una strega di rapina
Core u mio sognu in ruvina
È s'intanna in lu mio core
À cunnosci tù a miseria ?
In u paese marturiatu
Carchi d'angoscia aghjumellati
Ci correnu tanti sullati
In l'universu disgraziatu
À cunnoscu eiu a miseria !
Vedi ci sò li ghjorni
Scritti à u focu di a pena
Chì sumena in ogni locu, di vita
I so forni.