Scola in festa

L’associu Scola in Festa hè statu creatu in u 2001 grazia à trè giuvanotti di a regione. Dumè Bordas, Noël Emmanuelli è u ben di Jean-Jacques Emmanuelli. Per rompe u s’annoiu, anu dumandatu corsi di cantu è di chitarra à u canterinu Felì. Cusì hè natu l’associu Scola in festa !
Eranu trè, è oghje ghjornu sò 300 i giovani elevi di l’associu diventatu scola d’insignamentu musicale, artisticu è linguisticu, cunvenziunatu dapoi u 2012 cù a Cullettività di Corsica, a municipalità di Penta di Casinca è a Cumunità di Cumune Castagniccia Casinca.

Un antra cunvenziune l’adunisce à u cunservatoriu Henri Tomasi è u cullegiu di Fulelli di listessu nome, in u quadru d’un dispusitivu d’urari assestati (CHAD è CHAM) stabilitu pè a prima volta ind’un locu rurale. Tutti l’anni, dapoi a rientrata 2019, i novi elevi di Sesta ponu participà à stu dispusitivu in e discipline di ballu classicu è musica, durante i 4 anni di studiu sin’à a classa di terza. St’urari assestati li permettenu un insignamentu di 3 ore è mezu à settimana è di presentassi à l’esami di fine di ciclu.

Scola in festa mette in risaltu a lingua corsa in ogni disciplina è attività pruposta, in particulare in l’insignamentu musicale. Una lingua corsa cum’è puntellu di u sviluppu culturale di l’associu cù u ciclu di scuperta musicale bislingua prupostu à i zitellucci sin’à 7 anni. S’ampara à leghje è à scrive a musica. I giovani da 6 à 14 ponu raghjunghje u gruppu di cantu. Sò scumpartuti in attelli adatti à a so età. U cantu in lingua corsa hè fundamentale.

Scola in Festa hè diventata un polu culturale di prima trinca pè a Casinca, a Costa Verde, a Castagniccia, a Marana è aldilà. L’impegnu infranasitu di i so attori nè face a so ricchezza.