Spartera hè un gruppu vucale è musicale natu in u 2016, cumpostu da cinque cantadori è musicanti : Antoine Cesari, Grégory Ferrière-Castelli, Jean-Louis Simonpieri, Ange-Louis Denza è Ghjuvannu Gravini.
Arradicatu in u cantu tradiziunale è a pulifunia, u gruppu adunisce voce è ghitarre in un ripertoriu induve s’intreccianu canti tradiziunali, creazione è cumpusizione uriginale.
Cù e so sfarente voce, seconda, terza, bassu è contracantu, Spartera sviluppa un’identità musicale fundata nant’à l’ascoltu, a cumplementarità è a trasmissione. Longu à i so cuncerti è e so creazione, u gruppu face campà un ripertoriu arradicatu in a tradizione è, à tempu, apertu à forme nove di spressione musicale.
