Girasole

Sò ottu. Ottu orichjule d’un fiore innuratu di sole zitellinu. Ottu zitelli di loche cunfinenti trà Marana è Murianincu passendu pè Casinca è abbracciendu à Castagniccia.

Di stu fiore, sbucciatu dopu à parechji mesi di travagliu, a grana fù posta da Ghjuvanteramu Rocchi è Felice Travaglini. Un GIRASOLE hè crisciutu à u sole casinchese in u lucale di l’associu musicale è culturale, Scola In Festa. A squatra pedacogica hè cumposta di sti dui tercani di a creazione musicale cù l’aiutu fidu di StefanuTravaglini.

GIRASOLE ùn hè solu un gruppu di cantu zitellinu, GIRASOLE hè una vuluntà di trasmette. Trasmette a lingua corsa, a musica, a cultura, sempre cù gioia è piacè.